Saopštenje: Okrugli sto ,,Mediji i društvena odgovornost”

Danas je u Ministarstvu održivog razvoja i turizma održan Okrugli sto „Mediji i društvena odgovornost“ u organizaciji Mreže za društvenu odgovornost.

Okrugli sto je otvorila Daliborka Pejović, državna sekretarka za održivi razvoj u Ministarstvu održivog razvoja i turizma i koordinatorka Mreže za društvenu odgovornost koja je istakla važnost uloge medija u edukaciji šire javnosti o društveno odgovornim praksama, kao i u podsticanju novih dobrih primjera prakse.

U okviru prve panel diskusije O konceptu društvene odgovornosti, koju je moderirala Eleonora Albijanić, jedan od prvih trenera za društvenu odgovornost u Crnoj Gori, istaknuta je uloga svih društvenih struktura u sprovođenju koncepta, kao i sam razvoj koncepta od društveno odgovornog poslovanja do integrisanog društvenog poslovanja odnosno društvene odgovornosti.

U okviru prve panel diskusije, o ulogama različitih društvenih struktura o konceptu društvene odgovornosti govorili su: Anica-Maja Boljević (Fond za aktivno građanstvo), Ana Rašović (Unija poslodavaca Crne Gore), Igor Majer ( Elko Tim), Slađana Radović (Societe Generale banka Montenegro), Goran Božović (opština Tivat), Marija Jovović (Ministarstvo rada i socijalnog staranja) i Bosiljka Vuković-Simonović (Mreža za društvenu odgovornost).

U okviru druge panel diskusije Mediji i društvena odgovornost, koju je moderirala Marijana Kadić-Bojanić, glavna urednica Vijesti i članica Mreže za društvenu odgovornost, posebna pažnja je posvećena ulozi medija u promovisanju samog koncepta društvene odgovornosti ali i načinima na koje mediji, kao kompanije, mogu biti društveno odgovorne odnosno organizovati filantropske i humanitarne akcije. Takođe, istaknuta je važnost pravljenja razlike između promocije društveno odgovornih praksi i podsticanja drugih na društveno odgovorno činjenje i marketinga.

U okviru druge panel diskusije govorili su Veran Matić (B92), Ivana Čađenović (Represent Communications) i Patricia Pobrić (građanski aktivista).

U okviru diskusije, tokom oba panela, posebno su istaknuta pitanja kao što su važnost postojanja nagrada koje imaju za cilj da promovišu i podstiču dobre društveno odgovone prakse ali i definisanja jasnih kriterijuma prilikom dodjele nagrada kako bi se izbjegle negativne konotacije ovog koncepta.

Takođe, istaknuta je važnost transparentnog sprovođenja akcija i društveno odgovornih aktivnosti, izgradnja partnerstava između predstavnika različitih društvenih struktura, značaj izvještavanja o stanju prije i poslije sprovođenja akcije i sl.

*
Okrugli sto predstavlja dio aktivnosti Mreže za društvenu odgovornost čiji je zadatak promocija i podizanje svijesti šire javnosti i zainteresovanih strana o konceptu društvene odgovornosti, kao jednog od mehanizama za postizanje održivog razvoja, a mediji su prepoznati kao ključna karika u ovom procesu.

Mreža za društvenu odgovornost postoji od aprila 2012. godine kao neformalno tijelo odnosno od jula 2013. godine kao Koordinaciono tijelo Ministarstva za održivi razvoj i turizam koje okuplja 37 članova/ica, predstavnika različitih društvenih struktura (resornih ministarstava, poslovnih udruženja, nevladinih organizacija, nezavisnih eksperata i sl) sa ciljem da promoviše i podiže svijest šire javnosti i zainteresovanih strana o konceptu društvene odgovornosti kao jednog od mehanizama za postizanje održivog razvoja.

Glavne aktivnosti Mreže su:
1) Umrežavanje svih aktera društva u cilju promocije koncepta društvene odgovornosti;
2) Priprema savjeta i strateških smjernica Vladi Crne Gore za razvoj i primjenu principa društvene odgovornosti;
3) Promocija koncepta društvene odgovornosti kroz konkretne društveno odgovorne aktivnosti i afirmacija postojećih dobrih praksi u oblasti društvene odgovornosti.