Staratelj

Staratelj

O djeci se staraju roditelji. Nažalost, ima djece čiji su roditelji umrli ili su nestali ili im je zabranjeno da se staraju o svojoj djeci, jer su ih zlostavljali i nijesu o njima brinuli. Takvoj djeci se postavlja staratelj.

Šta je staratelj?

Staratelj je lice koje djetetu bez roditeljskog staranja postavlja Centar za socijalni rad sa zadatkom da kao roditelj brine o djetetu.

Ko može biti staratelj?

Ako je tvoja situacija takva da ti je potreban staratelj, za tvog staratelja može biti imenovan neki tvoj rođak/rođaka, ako oni to žele, ili neko drugo lice. U Centru za socijalni rad će o tome s tobom porazgovarati i pitati te za tvoje mišljenje.

Koje su dužnosti staratelja?

Ako ti je postavljen staratelj, on/ona je dužan/dužna da o tebi brine, da vodi računa o tvom zdravlju, vaspitanju, obrazovanju i osposobljavanju za samostalan život i rad. Staratelj je dužan da se prema tebi lijepo ponaša, da štiti i zastupa tvoja prava i interese.

Dužnosti staratelja prestaju kada napuniš 18 godina.