Danas je u Vatikanu, u prisustvu brojnih državnih delegacija na visokom i najvišem nivou, predstavnika vjerskih zajednica, kao i preko 120 hiljada katoličkih vjernika iz čitavog svijeta, na svečanoj ceremoniji kanonizacije, papa Franjo proglasio svetom majku Terezu od Kalkute.
Crnu Goru na kanonizaciji predstavljao je Veselin Šuković, ambasador Crne Gore pri Svetoj Stolici.
Majka Tereza rođena je u Skoplju 1910. godine, u albanskoj katoličkoj porodici. Sa osamnaest godina je odlučila da se posveti "Božjoj službi" i nakon Irske, gdje je postala članica reda "Irskih sestara", specijalizovanog za humanitarne misije u Indiji i Bengalu, živjela je u Indiji - Kalkuti, u kojoj je ostala do kraja života pomažući siromašnima, bolesnima, nemoćnima i svima onima "zanemarenim od društva". Osnovala je katolički red "Misionarke ljubavi", koji ima preko 3.000 časnih sestara, angažovanih u dobrotvornim centrima i humanitarnim misijama širom svijeta.
Majka Tereza je 1979. godine dobila Nobelovu nagradu za mir, a blaženom je proglasio papa Jovan Pavle II, na svečanoj ceremoniji beatifikacije u Vatikanu, 2003. godine.
Na današnjoj svečanoj misi, papa Franjo je, zahvaljujići majki Terezi na njenoj višedecenijskoj nesebičnoj pomoći ugroženim i marginalizovanim duštveno-socijalnim kategorijama , posebno istakao da je “za mnoge čiji život je dotakla, bila svetica i mnogo ranije od njene kanonizacije”.
MINISTARSTVO VANJSKIH POSLOVA I EVROPSKIH INTEGRACIJA